Tanong ko, Sagot ko

Dear Anthony,

Masugid po akong taga-basa at taga-sunod ng iyong blog. Kahit alam ko na nagmamagaling ka lang at nagmamatalino sa mga ginagawa mong post dito, eh pinili kita na hingan ng pera tulong at sagot sa katanungan kong ito. Hayaan nyo po sana akong ibahagi ko ito sa napaka-humble mong blog. Ang tanong ko po ay ganire...

Ako po ay simpleng tao lang. At may nagugustuhan po akong isang babae. Babae na parang ang hirap abutin. Napakaganda nya at masayahin. May pinag-aralan at may maayos na trabaho. Mukhang suplada pero napakabait kong sya'y makakasama mo. Mabuting kaibigan at napaka-swit. Parang napaka-perpekto na nyang babae para sa akin. Ano po ang aking gagawin? Gusto ko syang ligawan at hindi ko kamukha si Jun Pyo? Malayong malayo ang aming mga estado sa buhay. At hindi pa ako nakakatapos ng pag-aaral sa ngayon at wala pa ring matatag na trabaho. Wala po akong maipagmamalaki sa kanya kundi ang ka-cutetan ko lang at pagiging mabait. Ano po ang maipapayo ninyo sa akin? Maraming salamat po sa anumang tulong na maibibigay ng inyong matalinong utak sa akin.

Umaasa sa matalinong sagot,
Anthony


PS: baka po puwede na bigyan nyo rin po ako ng tips kung ano ang mga dapat kong gawin para makadagit ng magandang syota. :)



********

Dear Anthony,

Salamat naman at napagtitiisan mong basahin ang mga pinopost ko dito sa blog kong ito. Natutuwa ang mga laman-loob ko sa tuwing nakakabasa ng mga tulad ng ganito na humahanga sa aking mga gawa, at nakapagbibigay ako ng insiprasyon sa ibang tao na nawawala sa tamang landas. Dahil dyan ay nanalo ka ng prepaid load, worth P300! Pasaload mo muna ako sa number ko para ma-claim ang iyong premyo. O kaya alltext 20, pwede na yon.

Magpunta tayo sa iyong ikinukunsulta sa mataba kong utak. Nabanggit mong may napupusuan kang isang dalaginding at hindi mo alam ang gagawin dahil siya ay diyosa at ikaw ay isang maralita at isang hampas lupa. Mahirap nga iyan, bukod sa wala ka talagang pag-asa tsong, eh masasaktan ka lang ng bonggang bongga. Subukan mong sumulat sa ibang blogger na lang at baka matulungan ka nila kesa sa akin. Mas may alam sila pagdating sa ganitong problema.

Pero kung ako ang tatanungin, aba! bakit hindi mo subukan tsong! Ligawan mo sya. Wala namang mawawala kahit hindi mo kamukha si Jun Pyo ng BOF. Kahit tanging ka-cutetan mo lang at kabaitan mo lang ang maipagmamalaki mo sa kanya, eh sapat na iyon na sandata para sumugod sa labanan. Iba nga dyan eh, ampanget panget ng itsura pero tignan mo ang syota, palong palo! Yan din ang hindi ko maintindihan ngayon eh, ang ganda ganda ng babae tapos pag tumingin ka na sa bf nya, mas gwapo pa ang aso. Marahil magaling magpatawa yung lalake kaya sinagot. Pero tsong, maputol ko muna ang pag-iimagine mo sa mga sinabi ko, mas maige siguro kung magsikap ka muna sa buhay. Hindi ko sinasabing tamad ka o patambay-tambay lang sa kanto, pero ikaw na rin ang nagsabi na hindi ka pa natatapos sa iyong pag-aaral ngayon at hindi rin ganun katatag ang pinapasukan mong trabaho. Oo nga't may maipagmamalaki kang ka-cutetan at kabaitan sa sarili mo, pero mas maganda siguro kung may diploma ka at payslip o kaya naman ay bank account na isasampal sa mga magulang ng aasawahin mo. Tiyak na hindi ka aawayin ng magiging biyenan mo kung nakikita nila na ok at nagbubuhay reyna ang anak nila sa iyo. Kung gusto mo naman, itanan mo na sya kaagad! Malawak ang EDSA. Pwedeng pwede kayo dun. Sa dami nyo dun, pwede na kayong bumuo ng isang asosasyon. Malay natin, makita kita isang araw na kumakatok sa bintana ng kotse ko. At mag-eeleksyon na, darami na naman ang tarpaulin sa kalsada at pwede nyo itong nakawin para gawing higaan. Ganun lang kasimple, pero kung may pangarap ka sa buhay, at gusto mong magising sa umaga na may limpak-limpak na pera sa kama mo, eh tsong, kumadyot kumayod ka ng matindi. Hindi rin naman yan para lang sa sarili mo, o sa pagtulong mo sa mga magulang na naghirap na magpalaki sa iyo, kundi para rin sa pamilya na bubuuin mo. Ayaw mo rin naman silang makita na pumipila sa mga libreng feeding program ng gobyerno para lang may makain ang mga anak mo.

Ukol naman sa request mo na mga tips kung ano ang mga dapat gawin para makadagit ng magandang syota, anak ng teteng naman oh! Sa akin ka pa nagtanong, eh wala rin akong syota ngayon! Dun ka magtanong sa mga D.O.M. na hindi nawawalan ng pinapasukan... Pero, may ilang mga tips ako na ibabahagi sa iyo, at sa iyo lang, upang magkaroon ka ng syota. Huwag ka nang umasam pa ng maganda. Huwag ka na mamili.

Ano ang Kartada? - sukatan ng itsura ng isang babae/lalake. Nasusukat ito sa pagtantya ng iyong pagmumukha mula 1-10, kung saan ang 10 ang pinakamataas, ibig sabihin, sila ang mga gwapo at pinaka-imposibleng syotain na nilalang.

(Kung babae ang example natin...)

Kartada 5-pababa: Mga patapon na babae/lalake. Madalas makita sa mga biglang liko at sinehan sa Cubao.

Kartada 6: Kung tawagin ay "pang-tropa lang". Sila ang mga babae na madalas makihalubilo sa mga lakad, inuman, at kung anu ano pang gimik ng barkada. Kung babae, maangas lang kung sumagot, umaapir at nag-iipit ng bente-singko sa tenga. Payag na sila sa isang balot na pan de coco at isang litro na coke na meryenda. Mas menos gastos.

Kartada 7: Ang pang-wasakan. Sila ay nakikihalubilo rin sa inuman ngunit nakakimi at tahimik. Hindi ganun kagarapal at kaangas kumilos gaya ng kartada 6. Pinipiling syotain ng iilan dahil simple lang at hindi "high maintenance", kumbaga ok lang kay girlie ang kahit saan, basta kasama ka nya.

Kartada 8: Ang mga nag-aaral sa Merriam College at mga kolehiyala. Naka-make-up na hindi makakapal at may hawak na Starbucks coffee sa tuwing pumapasok. Maibibilang din ang mga office girls at call center agents na nag-eenglishan pati sa MRT (aurg!). Msyadong high maintenance ang mga ito. Ibayong pagsusumikap at gastos ang haharapin para mapasagot. Hindi uso sa kanila ang sumasakay sa jeep. Taxi ang katapat nila.

Kartada 9: Ito ang mga dinadala na sa harap ng dambana ng simbahan at pinakakasalan. Gagawin ang lahat para lang mapasagot ang mga ito. Malapit na sa pagiging perpektong babae. Hindi niloloko at pinagsisilbihan ng tapat.

Kartada 10: Ang imposibleng babae. Perpekto sa lahat at lubhang napakaganda. Walang ganun. Kaya kung ikaw ay kartada 10, niloloko mo lang ang sarili mo. Nagmamaganda ka.

Una, lower your standards sa babae. Tumingin ka sa salamin at makikita mo tiyak ang iyong sarili. I-rate mo ang iyong pagmumukha mula 1-10, kung saan 10 ang pinakamataas. Ngayon, kung nalaman mo na kung ano ang kartada mo, yun din ang magiging batayan mo sa pagpili ng syosyotain mo. Huwag ka nang umasam ng kartada 10 na babae kung ang kartada mo lang ay 7, bukod sa gagastos ka lang ng maraming pera sa panliligaw rito, wala ka pang kasiguraduhan na sasagutin ka dahil hindi ka nga ganun kagwapuhan. Pumili ng katulad ng iyong level ng kartada. Sa ganitong paraan, nakikita ng mga tao na bagay na bagay nga kayo at kung sakaling mabasted ka man ay hindi ganun kasakit, lalo sa bulsa.

Pangalawa, don't be yourself. Sa panliligaw, huwag kang maging kung ano ka. Syempre, kung madalas kang mangulangot, eh ipapakita mo ba na ganito ang ugali mo sa taong nililigawan mo? Magpanggap! Ipakita na napaka-swit mong tao, na napaka-maalalahanin mo. Iparamdam sa kanya na sya lang ang nag-iisa sa puso mo kahit marami silang nililigawan mo. Magbuhos ng effort kahit pakunwari lang. Mag-isip din ng mga nakakakilig na gimik kahit hindi mo talaga gawain ang ganun. Mapapansin ng nililigawan na sinsero ka sa kanya at mapapasagot mo sya sa mga pagpapakitang-tao mo.

At ikatlo, less talk, less fight. Ito ay pagkatapos na maging kayo ng nililigawan mong girlalu. Para mapatagal ang relasyon, iwasan ang pag-aawayan. Common sense na lang at madali naman intindihin ang pangatlong kundisyon. Maniwala ka, epektib to!



Ayan, sana ay natulungan kita at nabigyan ng kasagutan ang iyong tanong. Narinig ko lang sa radyo ang iba dyan at hindi nanggaling mismo sa akin ang ideya. Sa susunod ay huwag ka nang magtatanong kung alam mo naman ang sagot sa tinatanong mo. Nakaka-abala ka sa akin. Pero tsong, seryoso man ako o hindi, tapusin mo pa rin ang pag-aaral mo. Yan lang ang maipagmamalaki mo sa mga magulang mo at pati na rin sa sarili mo. Malay mo, maging katulad kita, na matalinong blogger, at nagpapayo rin na tulad nito. Ayaw mo ba nun?